Olih :
_PANDE KADEK JULIANA_
Siap sangkur dirurungé noltol jagung,Siap srawah kakah-kékéh nagih menang,Beli lacur iluh bongol nyusul rurung,Beli Sugih iluh ngecéh nagih juang.
Béh kenyir-kenyir Pan Doblét majalan sambilanga magending sanjané ento nyujuh Balé Banjar Désa Talulung, genah para bebotohé makumpul sanjané ento. Mapan Pan Doblét suba majanji ngajak timpalné lakar ngaba siap kar paluanga di tajen, mih di palane paglayut kisa di kiwa tengen misi siap manuk kurungan padung aukud.
“Jani ba kar cager maan pipis né, manuk dadua, biing kalawan klawu. Jani suba lakar kembar di tengah kalangan tajené, Jeg..jeg pasti menang! Yen suba menang, pasti ada bebotoh lakar nyak meli mael siap iragané,” kéto kenehné Pan Doblét ngarenggeng sambilanga makenyem buka anak nyem punyahdi jalan nginem berem magoh kaliadrem naarné kedem-kedem sada kijem-kijem.
Gelisin satua énggal, sing ja makelo Pan Doblét majalan, suba sagét teked di arep Balé Banjar Talulungé. Apa makrana kéto, mapan di jalan kaduduk, ajaka magandéng baan timpalné ané dibiané ajaka majanji kar maklécan. Sing ja lén tuah Pan Duleg, timpalné Pan Doblét uling Dajan Desa ané mula terkenal, kasub di kalangan tajenné dadi juru pakembar, juru gecel siap sané lumrah kabaosang Saya.
“Blét, aké tuni maan ngungkabang lontar pengayam-ayaman, né patut isinné anggon tetenger iraga dadi bebotoh di petajenan apang menang, tusing ja menangis. Jani rainané Saniscara Wage, ditu oraanga : Ngajanang sareng Kangin, lé ayam saking Kelod Kauh. Raja : ijo biru lékong sandeh bang karna mata selem; Jaya : Buik, Klawu, sekedas lekong; Kaon : Wangkas kuning kuping putih, biing, brumbun, serawah papak kuning kuping putih. Toh, kéto isin lontaré. Ngerti ci?”
“Aduh, icang sing ngerti ané kéto-kéto Leg. Kalingan lontar, maca huruf latin biasa dogén icang sing kekeneh, awak lacur tuara lulus SD. Kalanga jak panaké, cenik-cenik cara janiné suba dueg mamaca. Apa to isin lontaré misi kaon wangkas? Ae yen di tajen pisé telah, wangkas pasti kaon! Hahaha..”
“Jeneng ciné puk! Néh to suba cai sing dadi orain aké uling pidan! Kadén suba orain tamatang ibané masuk SD, mara suud peplajaan magending cai suba suud masuk, jelap nyemak gaé ngarit poloné! Yén nyak ngelanjut cai dugasé ento masuk, méh suba dadi Pegawai Negeri cai jani!”
“Ah, ento cai suba ja masuk kanti tamat SMEA pidan, jani sing ja dadi Pegawai Negeri? Payuan dadi tukang gecel siap di tajen cari jani? Hahaha.., Icang ba ja kekanggoang gén amonéan, mirib amoné suwécan Widhiné, yang penting cukup madaar, ngidaang icang jani ngasukang panak pang sing belog cara nanangné, ba cukup!”
“Béh, madingang jalan mula cai Blét! Aké wak bengal kéné orain cai dadi Pegawai Negeri ija ya cocok! Wak demen 5M kéné! Nyanan telah bakat korupsiang aké pipis negarané nyen! Hahaha..”
“Apa buin ento satuan cainé 5M Leg? Jeg tawah-tawah pesu istilah ciné né! Orain naé icang apa madan kéto?”
“5M sing tawang cai? Sing suba cai taén mabalih TV, mabalih Dharma Wacanané Ida Pedanda Gunung. Pepes ditu sambatanga dedemenan akéné idup Blét! Kwala oraanga penyakit ento kin Ida Pedanda Gunung!”
“Cang TV sing ngelah, kudiang mabalih?! Ento panaké netep ka pisaga gen mabalih TV. Kalingan icang nawang Dharma Wacana pada nyen! Mabalih di banjar neteg nak maplalian bola pebaliha, bola abesik rebutina ajak liu, suba bakatanga buin tendanga, buin rebutina. Mula soléh-soléh jelemané jani!”.
“Aruhhh...! Nak maén sepak bola mula kéto Bléééttttt....!! Aturané mula kéto, bola sing dadi jemak, harus tendang....!!,” Pan Duleg nengkik sada grimutan ningeh Pan Doblét ané belog tur katrok.
“Icang tara ja nawang toh..! Pelihang icang ing nawang kéto?! (Pan Doblét jenget) Men.. men.., 5M ciné to apa? Aéng makelon ciné nyelasang, énggalan icang engsap!”
“Béh, nu ci nyecedang masih! Haahaha...! Basa anak ABG cara janiné, képo san ci Blét..! Nah orina ja, 5 M ento sing ja lén : Mamunyah, Mamotoh, Mamirat, Malali, tekén Mamitra. To ba 5M versi akéné pang tawang cai Blét!”
“Ohh..., sing misi memadat Leg?”
“Ah, aké sing hobi memadat, adénan malali jangin! Hahahaha...! Né paling asik ento Makicikan alias Mamitra nok...! Wkwkwkwkwk....!,” I Duleg ingkel-ingkel kedék maan ngencanin I Doblét.
“Icang tuah masuk abesik 5M cainé ento Leg! Demen icangé tuah Malali. Yén mamotoh icang sing, nak icang ke tajen sing ja ngetohin momo. Icang nak tuah babotoh kanggoang, yen ba suud matoh, suud icang matajen! Pang da malali galang bulan, ilang bati telah kemulan!”
“Buihh, nutur ancruké né puk..! Sepet-sepet mulai munyin ciné né Blét..!”
“Sing ja keto, Apa buin cara cainé demen makicikan! Aruhh..., kena AIDS nyen! Wayan Bongol kena singaraja nyen Leg!”
“Singaraja maksud ciné??”
“Eh, raja singa! Penyakit dagang Leg, sepi lais..! Hahahaha..... Cara pidan kan taén cai kéto Leg? Paling ja ngalih ubad, jeg sing kapok-kapok! Nyen ja ento makada to Leg? Mbak Yu, janda ling Banyuwangi to ae? Ae leg? Naéh orang naé..! Hihihi...!” Ceced Pan Doblét nakonin Pan Duleg undukné pidan.
“Aruhhh... sajan ci Blét, membuka perih atin akéné pidan gén ci puk! Buina ngujang ci nakonang ento? Képo sajan cai Blét..! Péngen tau buanget ja ci nok...! Buin cai ngungkit-ngungkit masa lalu akéné, nak ba cara judul lagu kisah aké né, ento kesalahan terbesar dalam idup aké ngalih Mbak Yu! Ané malun-malunan nak luung én séhat-séhat siap Jawané ané taén gecel aké Blét. Jeg nadak dugas ento pelih pilih, baan luung leh kulitné, késingné nyalig, jitné makroom nyalang, masuluh ngidang ditu nok, dong jeg...! Nyén nawang tengahné penyakitan! Telah pisé bana anggon maubad ka dokter Sogi!”
“Ahh.., dokter Sogi kadén dokter gigi to Leg??”
“Ae nok..., dadarané kat orain Mbak Yu nguluh nyesep urutan jeg nyangkét digiginé nok! Kelés kawat giginé neket di anun akéné! Arughh, aget sing pegat, telah macécéh pesu getih gas to. Ngemasin buung makicikan kutus bulan ngantosang segerné. Lén kurenan akéné gecel pisaga gara-gara sing taén prutput! Né jani kurenané beling buin, ragu bana sing ja raga ngelah kepatutané to!”
“Leg, dadi cang kedék? Cang kar kedék malu! Wkwkwkwkwkaa...! To suba upah bes nakal cai Leg! Mihh, kanti engsutin kawat gigi Wayan Bongol cainé né! Dong sing ladné tepuk bungutné makawat dugasé ento? Kadén icang cai kena raja singa men!”
“Yen raja singa sing mungkin cang kena Blét, bilang keto cang nak mahelm I Wayan! Gas to ba jeg Buda Wagé galang bulan! Bayu gedé ba sing tahan nok, jeg langsung bukak-bukak korin karaoké pemanasan! Memeteng aké gasé ento di wisma! Mimih.., ngeling-ngeling aké bana gasé to nepukin anun akéné mabedbed cara mumi, aget sing misi balsem. Yen misi balsem sie ada mumi Ayan Onol dadiné! Gempar bisa di TVné! Hahahaha...! Ba oraang di kenyangné gas ento jeg pedih gen lad tatuné, makané makelo segerne nok, pragat pegat gén jaitané..! Gering petang bulan aké ngamah tapé Blét, pang ilang ja buang akéné!”
“Béh, sajaan I Duleg, suba sakit enu masih nyidang kedék cai né! Men kurenan cainé sing jeg sedih kingking nepukin patin arit cainé sing dadi anggon?”
“Ento suba, jeg brééééngsééééééékkkk.....! Balas dendam ya ajak aké, memitra poloné masih gas aké gelem. Lén kar nguliang buang akéné ané ilang ulian naar tapé to keweh pesan! Kayang jani mara ngidang gridip-gridip dogén nok..! Nyak sing siteng cara pidan, irib kena pastu né..! Aruhhh...!”
“Né suba kabaos tukang gecel di tajen pelih ngecel demen ngecel siap pisaga, payu lantas siapé jumah gecel pisaga! Hahaha....!”
“Mendep ci Blét..! da uyut...! Sakit kenehé ngingetang unduké ento buin. Jani ajaka meliang-liang malu, dini ilangang gedeg basangé! Cén siap cainé? Ajaka paluang aliang musuh..!”
“Né tolih, siap manuk kurungan icangé.. biing kalawan klawu, awak siteng kekar, kampid samah, jangar ngérab, paruh lanying, kuku tajem! Yén paluang jeg pasti menang..!”
“Aruh, né biing oyongang jani, né klawu gen paluang, né wangsit ling lontar pengayam-ayaman né tuni kebitang icang!”
“Men yen sing paluang, sing maan pipis?”
“Né ba lén kelas mamotoh ajak bebotohé. Cai kelas bebotoh kéné, suba suud matoh, suud! Sing ngenehang mani buin ada Tajen di Delod Desané. Yén jani makejang paluang, mani apa aba ka tajen?”
“Nah ba ja kéto, kanggo ci gén ba! Icang dadi ikuh nak nuut.. yang penting binsep mulih ngaba pipis, ngaba bé cundang. Apang ada timbung anggon daarang nasi!”
Majalan lantas ajaka dadua ka tengah kalangané ané ramé baan selukan para bebotohé ané mamotoh. Riuh munyiné ngebekin Bale Banjar Talulungé. Dagangé masih bek pada matanja, dagang kopi, dagang nasi, dagang inuman, dagang baju, kating Ceki, Blokiu, Spirit, Kocokan, Bola Adil, ada masih ditu. Suba cara pindekan tempuh angin, cenged pinceran pipisé ditu di tongos tajené.
“Cok, cok, cok..,
gasal, gasal, gasal..cok, cok, cok... Pung! Kaonnn...!!”
){kind=link}
Posting Komentar
Posting Komentar