Om Swastyastu, sameton Blijul ring dija ja magenah. Kénkén kabaré jak makejang niki? Dumogi rahayu ngih. Musim utawi pandemi covid-19 kantos mangkin durung wusan, makéh banjarané kasengsaran ulian keni Covid puniki. Wénten taler sané sampun kantos ngemasin, amoring Acintya. Utamannyané tenaga médis, sampun makéh sané lampus.
Ulian sué tan pegat-pegat kahanan covid-19 niki ring jagaté, ngawé perékonomian iraga magladuran. Sambrag rejekiné, napi malih sané makarya ring séktor pariwisata. Ulian lock down, PSBB (pembatasan sosial bersekala besar), ulian syarat menék pesawat merapid, swab, rapid anti gén, muah sané lianan. Tamu wisatawané jejeh pesu, ané bani pesu, berat diongkos ulian liunan syarat, tamu doméstik muah internasional makejang sing baanga kija-kija. Panadiané, makejang sepi di Bali, ulian iraga mateenan di séktor pariwisata makejang. Hotél sepi, réstoran sepi, penginapan sepi, bungalow sepi, warung sepi singa da nak mablanja. Makejang kena iyusan. sakit sirah para pelaku pariwisatané ulian i covid-19 sing ilang-ilang.
Berat kasusé mula. Sang ngamong rat, pragat uyak ngemaang peringatan doén lantas. Solusi dibalik gering kantong ulian corona niki tan wénten solusine. BLT nyén kadén maan, pidan dugas pendataan penduduk miskin, pariwitasa sedeng kenceng, pis ada gen, gengsi ngaku miskin. Buina jeg sing ja tergolong miskin awaké dugasé ento. Jani lantas, lakar balik magaé ka carik, carik pun meadol. Kar balik makarya ka tegalé, tegal tan madue. Ané ngelah tegal, ngolah sing bisa, tegal suba bet baan makelo sing karunguang. Adah...!! Budi kar magaé tukang, sekil tukang sing bisa, jejeh limané lécét ulian sai ngadukang luluh, nongdong batako. Pocol skin carean uli pidan jani uyak gae daki. Adah...!!! Lacur mina.
Jalan satu-satunya, jeg pariwisata harus pulih buin. Bali bangkit, jani. Solusiné? tuah ada di déwéké, sing ja dija-dija. Iraga harus mabrata seken-seken. Apa nto peringatan pemerintahé, ané madan 3M (memakai masker, mencuci tangan, menjaga jarak) patut kukuhin. Da ampah campah terus. Ulian ampah campahé jani makelo layah. Buka ada buin cara jani tambahan 3 M-é nto dadi 5M (memakai masker, mencuci tangan, menjaga jarak, menjauhi kerumunan, membatasi interaksi dan mobilitas) laan agemin jak makejang. Tuutin anjuran pemerintahé, da buin bengkung. Apang i virus corona, covid-19 ené tusing buin berkembang biak dadi liu tur menyebar ideh-ideh. Makejang sehat, makejang aman. Sinah pariwisatané buin kembali pulih cara ipidan, cara i malu.
Imbuhin buin bedik, cara jani ada ané madan vaksin covid-19, pemerintahé nak suba mautsaha, apang makejang maan vaksin, anggaran di pemerintahan makejang direfocusing dadi bia anggo meli vaksin. Lamun suba makejang mevaksin, sing buin sibuk uyak masker, uyak menjaga jarak, uyak pembatasan sosial, makejang pasti énggal pulih.
Sakéwala, lamun suba kebiasaan buka cuci tangan, nganggo masker lamun maluas-luasan ento suba iraga biasa laksanaang, da ubaha nto, yen gumine pet pradé suba oranga bébas covid-19. Mapan kebiasaan cuci tangan ento melah, anggo keséhatan iraga padidi. Nganggo masker lamun pesu, di jalan, di peken, ento melah. Da ubaha, nak luung to nyen. OK.
Ngih, amunika doén satua kéné-kéto rahina mangkin, kirang langkung, aksamayang jro. hehehe.. Ayo ikuti prokes 5 M, da kendur da lelor, kencengang prokesé niki. Paturu sameton yuk saling gisi, saling isi. Pakéwuh nyamané jani, nak bisa iraga katiba masih buin pidané, lan saling isi, slaing gisi. Suksma. (PKJ)
Posting Komentar
Posting Komentar