Subakti Ring Guru Pengajian
“Om Swastiastu”
Para panureksa sane wangiang titiang,
Para atiti miwah uleman sane suksmayang titiang,
Miwah semeton samai sane tresnasihin titiang,
Angyubagia atur uningayang titiang majeng ring Ida Sang Hyang Widhi Wasa, santukan sangkaning asung kerta nugrahan Ida, titiang pingkalih Ida Dane prasida kacunduk sadu ajeng ring rahina sane mangkin. Ring galah sane becik puniki titiang jagi matur-atur samatra nganinin indik "bakti ring guru pangajian"
Ida Dane sareng sami sane wangiang titiang,
Ring era globalisasi puniki ngranayang parajanane akeh sane lali ring swadarmanyane dados sisia, Para sisiane akeh sane seneng malancaran, miwah maplalianan game-game sane akeh rauh saking duranagara. Sakadi sane sampun kauningin akeh mangkin semeton titiang para sisiane sane milih maplalian PS miwah plalianan tiosan sane mawinan males malajah. Punika mawinan akeh anake sane maosang munguing moralitas parajanane sayan-sayan rered. Sabilang wai pragat mayegan dogen paturu murid, pelih bedik sampun majaguran, ngajak geng miwah sane tiosan. Kadena yening sampun kadi punika kadena ragane paling aenge, ten mangenehang reramane jumah sane puntag-panting ngareh jinah mangda mrasidang nyekolahang pianakne.
Napi sane mawinan akeh sisia sane kadi punika? Nenten ja doh sane mawinan sisia seneng mayegan, silih sinunggil sane ngranayang inggih punika pergaulan di masyarakat, nika sayan-sayan ageng pengaruhnyane. Ring jaman sakadi mangkin akeh sisia sane iwang ngrereh timpal miwah nenten bisa nyaga dewek, minehang nicen sane becik tur iwang. Nenten ring masyarakat kemanten, wenten masih pengaruhne saking teknologi, sakadi acara pebalih-balihan sane nenten becik, nika sane kangge conto olih sisia mangkin ring kauripan.
Kamanah antuk titiang, menawi nenten wenten pamargi tios sane patut titenin sajaba digelis mawali ring ajah-ajahan ring agama. Mangdane iraga prasida dados manusa sane maguna ring jagate.
Semeton sami sane tresnasihin titiang
Ajah-ajahan sane becik punika sampun kapolihang iraga saking dumun, utamanyane saking rerama ring umah, jero utawi gria soang-soang. Nah, disampune polih saking rerama, nenten ja tios malih ring sekolahan kapolihang paplajahan punika. Guru sane ring sekolahan puniki kabaos guru pangajian sane ngicenin iraga kawruhan.
Ida Dane sareng sami sane rauh ring acara puniki, titiang uning ring katambetan dewek titiange. Sakewanten ring galah sane becik puniki iraga pinaka sisia patut ngaturang suksmaning manah majeng ring para guru sane sampun lascarya ngicenang iraga paplajahan ngantos mangkin. Yasan Dane nenten prasida kawales ngantos kawekasan, santukan sapunika iraga patut tinut ring penikan Dane sang guru pengajian. Guru pengajian pinaka guru ring sekolahan patut iraga singgihin sakadi nyinggihin rerama. Baktin iraga ring Bapak Ibu guru ring sekolahan pinaka cihna baktin iraga ring rerama. Silih sinunggil tata cara bakti ring Bapak Ibu guru nenten ja antuk jinah utawi arta brana, sakewanten antuk jemet malajah, ngicenin prestasi ring sekolahan miwah nyaga nama baik sekolah mangdane sekolah iraga punika tetep ajeg.
Ida Dane miwah semeton sane suksmayang titiang,
Ngiring saking mangkin iraga jemet mlajahang dewek mangdane napi sane kaicen ring guru prasida karesepang. Ilmu pengetahuan punika pinaka bekel iraga sane prasida kanggen ri wekasan, sane jagi nulungin iraga ngamolihang kauripan sane becik. Nenten pocol yening iraga mlajah santukan punika pinaka jinah sane prasida kanggen bekel. Sakadi punika agengne yasa Bapak Ibu guru, ngicen iraga bekel, anggen ngmargiang kauripan. Nenten ja jinah sane ngranayang iraga seneng, ilmu pengetahuan sane kaicen punika sane ngranayang iraga seneng, santukan nika sane kangge bekel ngrereh pangupajiwa kawekasan. Santukan iraga kari nguda, mangkin galah iragane malajahang dewek, mangda nenten nyesel benjang pungkuran.
Ida Dane miwah semeton sane wangiang titiang
Wantah asapunika prasida atur titiang ring galah sane becik puniki, dumogi napi sane atur titiang puniki wenten pikenohnyane. Nenten lali titiang nunas gung rena pangampura yening wenten iwang atur titiang. Puputang titiang antuk parama santi.
“Om Shanti Shanti Shanti Om”
Posting Komentar
Posting Komentar