DIOLAS CINGAKIN - All get in

Dadi enu makejang maboya?
Dadi enu makejang ngelewa?
Sing pati rungu teken unduk,
Sing pati ajin ajak kaanan gumi,
Sing pati rungu teken timpal,
Mapineh teken dewek padidi dogen, 
Nuut panglimbak gumi,
Ane tusing buin misi sidi,
Lakar nyaringin sakancan daki,
Nguyak ngibukin awak pedidi,
Ngalih sakancan sekaya ane maya.

Jro, nika diolas cingakin,
Luu pasliwer ngawe daki telabahe,
Andus mangsi ngae opek palemahane,
Carik, tegal telah dados umah dados villa, 
Nyama pada macokrah ngebutin warisan,
Nyama pada saling singguk ngebutin damekan, 
Sing rungu tata titi makrama,
Kaanan gumin iragane suba ngancan benyah,
Ringsek ulian papineh momo angkara,
Jadmane sampun tan ajin malih ring pertiwi,
Tri Hita Karanane kaengsapang,
Jadmane suba liu ane tusing rungu teken tresna Widine,
Sing rungu teken olas asih masawitra,
Napi jro jagi sareng pacang ngalewa?

Jro, ngiring ganggangang sipahe, 
Ayunang lengene,
Tindakang batise,
Sledetang paningalane,
Rungu, rungu jro,
Lan bareng nyaga pertiwine,
Ingetin nyamane ane ngalewa,
Ane malaksana tan patut kin dharma, 
Apang iraga nyidaang idup asah asih asuh,
Jegjegang Tri Hita Karanane,
Gumanti iraga idup bagia kawekas.

Anggara Kliwon, 19-08-2014
PKJ