Semeng cara biasané, I Méngong negak betén jinengé sambilanga ngopi agelas katimpalin jaja gina matunu. Uli kantong celanané iamesuang roko abungkus lan colok gas.
"Béh mula jaen idup di Bali. Alam asri, brayané makejang nu ngukuhang tri hitakaranané. To kudyang sing asri? Iraga jani menikmati semeng-semeng, negak ngopi sambil ngaroko katih.. aighhhh...."
Nang Tegteg ané suba bangun uli daslemahé, gupuh matindakan nyemak gegaén ajk kurenané, kenyem-kenyem nyledétin pianakné betén jinengé negak santai ngalepus pesu andus uli bungutné. Buka tusing nepukin kénkén pratingkah reramané magarapan.
"Apa sledétin nanang, misi nyeréré keto buka anak sing cocok, nang?" Raos I Méngong nyandén bapané.
"Sing ada apa Wayan bagus! Nanang nak demen nepukin cai.. nglah nanang panak aukud, semeng-semeng suba buduh gramak-grumuk betén jinengé!"
"Ah, nanang...! Cang nak makeneh-keneh sambil ngrenggeng. Jaen idup di Bali. Buka icangé kéné.. semengan suba man kopi uli I Mémé, nolih palemahané asri. Jeg liang..!"
"Ae, nanang dadi cai bisaa masih ngomong keto Yan.! Semengan bangun jam 8. Mesugi, suba ada kopi, jaja matunu, misi nyiup roko katih.. suud kéto, nyemak hp, ngecel kekéto kanti tengai. Seduk basangé madaar ka paon. Ngujang sing jaen idupé?!"
"Mihh.. Nanang ngentékang né?"
"Sing ja ngentékang, nanang ngomong apa adané! Ada nanang pelih mamunyi mara nto? Yen misi ja buka nanangé, baangun daslemahé, nyampat aplebaan di palemahané, ngepélin umah, nyangih prabot, nektek dagdag, ngarit, laut ka carik.., mirib sing jaené cara cai Yan..!"
"Nah... to ba sambat...!!"
I Méngong laut ngambres ngojog kamarné laut maubetan jlanan. Kopi ajak jaja ginané kalaina betén jinengé.
"Toh, bapané mula demen ngalih ieg..! Ba tawang panak basangné alengkat, nu doén demen ngesah!"
"Hahaha... sesainé kéto méméné! Dong mirib makejang nglah panak cara iraga kekéné mabikas ladné nah? Apa kadén makada....!!!"
-PKJ-
Posting Komentar
Posting Komentar