Bengkung - All get in

Kukuruyuuuukkk.... kukuruyukkk.....

"Yan... Wayan Méngong, bangunang bané. Suba semeng, koné jani kar ulangan muridé? Bangunang awaké, paselidik masuk apang sing latan ked di sekolah."

Mén Wayan kauk-kauk nundun pianakné, I Wayan Méngong Agustinus Vanlengit.

"Eehh.. kondén ngenah matan ai mé, baang malu icang pules buin telung kinyukan," pasaut I Méngong uli di tengah kamarné.

"Nah, kango cai doén. Né penting mémé suba nundun, yén binsep cai telat, Mémé sing tanggung jawab!," pasaut Mén Wayan uli paon gelur-gelur.

Tungkula iteh Mén Wayan di paon, engsap tekén pianakné enu pules di baléné, suba jam 7 semeng, I Méngong sing masih ia bangun uli pulesané.

Krriiinggg....kriiiiinggggg..... kriiinggg....!!!

Munyin jam békerné I Méngong, lantas katinjak mapan ngulgulin buka I Méngongé pules.

"Aduh.. jam sing nawang jelema nu kiap.. krang kring, krang kring trus.. émang ba jam kuda koné né?!"

Lantas I Méngong bangun nolih jam béker ané ngelintik di beten.

"Imihh.. mémé, suba jam pitu liwat molas menit! Adi sing dundun icang pules? Kadén icang suba mabesen, ada ulangan jani di Sekolah!", gegancangan I Méngong numbrag uli pulesané ngojog paon nyemak cédok nyemak yéh laut masugi sebelas jari. Suud masugi laut maséh panganggo tur gegancangan nyemak motor Mioné, ngilut gas.

"Woé Yan...!! Adéng-adéngin... da mata nu kubil suba ngilut gas majalan masuk! Kadén suba dundun Mémé tuni, cai dasaré bedu! Bengkung yén sambatin! Panjusang malu awaké, lek atiné masekolah awak truna sada sing manjus! Né sarapan bubuhé malu daar. Bubuh Mayan Tagel Kuning, warungé diwang. Jaen pesann..!"

"Aduh ba telat mé... makatang sing buin madaar! Icang ada ulangan,"

Greng...greng...greng.... Munyin motorné I Méngong kailut.

"Woé, Yan..! Da ngebut di jalan, pagigisin ngilut gas!"

Gruuuénggg.... kondén pegat munyin mén Wayan masesambatan saget suba macucun jalér, macuet I Méngong ngilu gas motor Mioné.

"Gedabragggg.... priak..!!!"

"Woih, apa to? Nang.. nang Tegteg apa to makrosokan diwang? Mai jagjagin!," Mén Wayan gangsar malaib karurungé ngalih wit munyi makrosokan diwang umahné, Nang Tegteg ané uli tuniné iteh nyampat di sanggah gegésonan nyagjag pesu.

"Mimih.. ratuuuu..., dewan titiang! Wayan Méngong..!," Dapetanga pianakné maguyang diwangan umahé teteh Mio. Liu brayané nyagjagin tur nulungin ningtingang motor lan nyangkol I Méngong abana mulian tur kasaréang di amben balé dauhné.

I Méngong makesiab, kamemegan tusing pesu munyi tur angkih-angkih. Tusing ada ané sanget, tuah entud lan sikuné babak ulian makosod. Nang Tegteg ngusap-usapin gidatné I Méngong aji lengis angin tur ada masih brayané mersihang tatuné I Wayan.

"Aduhh.. Yan.. Wayan..! Kondén pegat munyin méméné mabesen. Cai ulah laku ngilut gas pesu. Dong suba I Sémpol medem sisin jalané tabrak cening!"

"Nah, da uyuta pianaké buin méméné, baang ya mategtegan malu," Pasaut Nang Tegteg.

"Ahh.. mula raré BENGKUNG!!! Tusing madingehang munyi!"

(Kendari, 28/9-PKJ'15)