Panen, Kartu Undangan Nak Ngantén - All get in

Lintang Pegat Wakan, Samah Brayané Ngantén. Iseng admin ma-facebook-an (9/11), imih brayané uyak status kondangan ngantén. Ada ngaku majalan uli semengan kanti petengé jani nu jumah anténé, misi ngorang sing keuber buin duang lokasi tongos kondangan koné. Mihh... ngeri!

"Jani, édisi sing ngajeng jumah! Uyak lawar di pisaga, #kondanganNganten"

"Uyak kondangan, uyak ujan, uyak macet.. aruhh... #kondanganNganten"

"Sané tan sida karauhin rahinané mangkin lédangang jro, Selikur tiang maan undangan jani".

Né lénan, nah sejenis kéto masih setatusné. Timpalé jumah di Bali sibuk mapayas, melali nekain resepsi timpalné ngantén. Admin ngiri bana dirantau, mapan admin marasa liu ngelah timpal (apa né akuin timpal marasa matimpal jak admin? Sing tawang masih to! Hehehe..). Pokoné liu timpalé ané ngantén jani, sing ada bakat delokin. Ada mirib ngejang kartu jumah di Bali, sing bakat delokin. Suba ja pragat gaén anaké yadiastun iraga sing teka. Pragat baan doa uli sosmed doén nyidang nyampaiang.

Jeg kénkén keto. Ulian belat pasih, batisé kejokan nyujuh. Rasa demen yén maan nglalinin timpal nuju dina bagia buka kéné. Timpalé masih demen iraga nyak teka ngucapang rahajeng, ngidihin nasi, ngidihin kacang kapri, muah kerupuk melinjo maimbuh seprit panta koka kola teh botol. 

Sing ja amplop jak isiné ané sanget arepanga jak né ngundang di kéto-kétoné. Nak tuah tekan iraga bertamu, ngucapang selamat, ento né arepanga. Maciri sang sané madué karya liu ngelah timpal, sing madan kuper lan tuna laksana masesana. 

Kwala, sing abedik masih brayané di sosmed ngeluh ngorang telah bekel isin amplop ulian nekain undangan resepsi nak ngantén. 

"Bek teka kartu, kén tekain? Gasir-gasir galir plaib amplopé.."

"Ngindengang amplop awaian.. meliah timpalé ngantén, iraga bindan ya?"

Sujatiné, nak né nepukin kondisi dompet puyung ulian ngisinin amplop kondangan kuang perhitungan né. Nak iraga kondangan, ulian undanga jak né nglah gaéné apang teka. Ba nyak teka gén, né nglah gaé suba bersyukur. Apa buin nyak idihin nasi, buih liang bayun timpalé. Unduk amplop to, tuah apresiasi. Akuda ja ngelah, akuda ja mampuné, amonto jangin. Da maksaang dewek nyangin amplop pang liu, pang da mapiring don biu, tékor, alias tekor. 

Yén maan undangan 10, ngelah pipis prai 100 tali. Kangoang padum dasa tali jangin amplopé. Masih sing ja ada nak kar nikté iraga unduk mamplop-amplopan. Teka, celepang ka célengané, tulis adan, nyemak jaja, kacang, krupuk, teh botol, negak. Teka anténé nyalamin, ada sing nakonang, "Ci ba ngejang amplop?" Sing ada! Ingetang masih, amplop ne cemplungang di céléngané da jangina adan. Pang da nyesek timpalé bukak amplop suud gaé, buin misi adan. Hehehe...!! Toh, simple kan?

Ingetang, tetujon timpal ngundang ento tuah nunas "Doa Restu", sing ja nunas amplop! Oke..??!! 

Nah kanguang malu monto. Tutur selép-selép nepukin timpal kondangan né.

Kendari, 9/11/16

PKJ.