Ning, enu cening inget gagendingan pupuh ginadané? Ané kéné nto apa...!
"Eda ngadén awak bisa, depang anaké ngadanin, geginané buka nyampat, anak sai tumbuh luu, ilang luu buké katah, yadin ririh, enu liu kaplajahin"
Yén pinehang aéng melah tutur digendinganné ento o? Jeg makulit, nanging malalung, nak tuah gending gaguritan mula kéto, dangan baan ngartos. Alih di arti sujati muah arti kiasan. Tuah tutur lingsiré ilu ané mula mautama. Bakat baan cening ngarerambang?
Iraga dadi manusa, da koné mapi-mapi dueg ndén. Lamun kondén anaké ané ngorang idéwék bisa. Da benya ngaku ririh, mapan di duur langit enu ada langit. Iraga saja marasa dueg, wikan, bisa, nanging nak nu ada né duegan nyan. Enu ada né nawangan nyen. Ento mawinan iraga sing dadi nigtig tangkah ngaku paling mangkana! Utawi Sombong.
Apa mawinan buka kéto? Mapan idupé, geginan idupé anak buka nyampat. Sabilang wai iraga lakaran nyampat mapan leluuné sing kar telah-telah, pét pradé luuné kedas, buké liu makepur. Suksmané cening! tuah anaké malajah ento sing ja lakar suud-suud, sing ja lakar pegat satondén Shang Hyang Atma ninggal raga. Sang Hyang aji Saraswati nak marupa segara, tan patanggu, tan pabongkol. Ilmu pengetahuan ento sing telah-telah baan mlajahin. Mara pragat cening malajahin nulis, mamaca cening patut bisa, mara bisa mamaca, ngitung masih cening pang bisa. Lantur cening malajahin idup. Sing lakar telah-telah nyan cening malajah, sangkal ada tutur, malajah salantang tuuh!
Karesep amonto baan cening? Ento suba mawinan iraga sing pesan baanga Sombong! Mapan amongkén ja ngaku jani duegé, nak sing saja nyen cening saja dueg makejang. Yadin cening bin pidan suba magelar sarjana, magister, doktor, muah profesor! Anak enu cening lakar perlu malajah. Utamané malajahang déwék ngaba gelar. Pang da ulian gelar cening pangkah GELAR-GELUR!!!
Kambara, 11-12-2016
Pkj.
Posting Komentar
Posting Komentar