Jumah ipidan tiang liu ngelah punyan sotong. Ada telung puun (liu termasuk to?) 😁 Ada sotong dadu (batuné barak), sotong putih (batuné seming), ajak sotong bogor (buahné gedé-gedé). Tumbuhné, paek lénengé apuun, di dajan meténé apuun, di teba apuun. Pas ba telu nto. Sotong pisagané sing bani ngetékang, yadistun pepes pongkodin. 😂
Dugas ento tiang enu cenik, enu SD, mra mayusa pitung tibanan. Tiang masih kaukina Deknik dugasé ento, munyiné nu badil, awake moglong. Béh asal suba tepukina ajak pekak Derana, sugra Dewa Hyangé, jeg jepit gembéla suba pipiné, sambilanga matakon. "I Bapak dija? I Bapak Dija?" 😅 Nak lingsir sayang jak nak cerik.
Balik ke sotong, ulian demené naar sotong, sing semeng, sing tengai, sing sanja, jeg suba cara bojog ngelanting ngempokin buah sotongé ané wayah-wayah. Beh liang atiné, ulian sotongé manis. Apa buin maan nyangol batuné, tengah-tengahné ento. Bihh.. Manis so nice nyen. Tuah ento doen ja mikané masih. Sing ngelah pipis anggo mablanja. 😂
Suba ngalimbak, buah sotongé suba mayusa tibanan, suba gede punyané, ané di teba suba kanti baha punyané kin I Bapa, kayuné anggona patin belakas, patin tiuk, patin arit, palu paet. Bah siteng sajan kayuné, kelas satu asané. Ane dajan meténé ya mati, ulian pepes kat encehin bomgkolné, minab. 🤣 Sing masih tawang. Enu ane samping léneng di aep, delod pamesuané gén. Sotong barak manis.
Dugasé ento, suba tiang tamat SMP. Suba masuk di SMA kelas satu jumah di Bangli. Sing ja suud demen tiangé ngajeng buah sotong. Hee.. Ulian sing ada amikan. 😂 Kalingan kar sarapan nyen dugasé ento, anak nu ngantosang i mémé suud ngaé nasi. Ampura ting dugasé ento nak kuang mampu, sakewala sing taén maan BLT. 😂 hahaha. Bantuan sembako msih sing. Ulian ngelah carik koné, padahal carik nak nu magadé. 😅 Nah kudyang men, lingkaran karma. Jani ja bantes nyidang makan enak sesai. Astungkara.
Nah, nuju akhir 2003 kar tiang menék kelas dua SMA, nyumunin suba basang tiangé bermasalah, béh penyakité paseliwer di awaké, buin panes, buin setep, buin koréngan batis kanti ke jit mananah. Buin setep kejet-kejet. Mih ubad Balian lan mantri ba kudang ubad kadén. Iseng ka dokter maperiksa, positif tiang kena apendik kéto. Usus buntu makeplag, mabrrakan isin bsng jk tainé di tengah. Aget tiang énggal maperiksa dokter, laut karujuk ke RS Bangli. Ponis dokter tiang maopersi besar. Matudag basangé uli duur pungsed kanti betén pungsud, duur turus. Mih linggahné matudag coy. 😅 Cék kali cék, ento batun sotongé ngengsut di usus buntuné kanti ngemasin mekeplag lan ngawé tiang gelem.
Beh aget lagas mapreksa dokter dugasé ento, las timpalé I Dude ngatehin ke RS, lamun sing keto bisa ngemasin the end. 🤣🤣🤣 Dugasé ento jejeh ke RS ulian sing ngelah pipis I Bapa. Mara suud megaenan, mara membangun abedik, tabungan i rerama mirib suba game over. 😅 Iraga lagas ke RS, sing mapitungan ajak rerama. Tapi agetné, liu nyamané olas, jeg kénkén kaden I Bapak ajak I Beli bisa maan nyilih pipis anggon biyaya operasi lan RS. Kondén buin nyama-nyamané liu ngenjuhin bekel di RS anggo nebus obat. Beh idup gelah buin. 🙏🏻😀 Astungkara.
Sotong ohh Sotong..! Ada-ada doén. Sangkal da campah naar sotong, batun-batuné da daara. Semeng-semengan ingetang masih minum yeh kedas agelas mara bangun, apang misi doén malu basngé. Mara dadi naar batu-batu kéto, cara sotong, sambel tabia lalah ané liu batuné. Pang aman basangé. Ok 👍🏻
Piteket Blijul né.
#sotong #jambubiji #ususbuntu #operasiperut
Posting Komentar
Posting Komentar