LÉLÉ MAKUMIS - All get in

Nuju sandikala tatkala I Méngong manjus.

"Nanang... mai delokin nang..! Icang bingung nang..! Mai... mai... nyeh cang nang!"

"Gigisang guar-guér kénkén Ngong! Lek atiné jak pisagané, kadéna nanang jak nani miyegan nyen!"

"Da liu koméntar malu nang! Mai.. mai... jagjagin icang.. Cang jejehné!"

"Nak éngkén nani kauk-kauk? Apa ada buat nyehin nani?"

Nang Tegteg laut bangun uli pasilané di ambén  balé delodné nyujuh WC tongos I Méngong manjus.

"Apa ada Ngong?"

Méngong masemu ngeling jejeh nolih ka betén.

"Ngii..ngii...ngiii... Nanang, apa né nang? Adi misi kéné? Dibi nak sing ada nang! Ngiiii...ngiiii....," Iing i Méngong.

"Apa ada? Lipan? Kalimayah? Temuyukan? Celedu?," égah-égoh Nang Tegteg majalan ngojog I Méngong.

"Lebih serem kin to nang..! Ngii..ngiii....ngii....", enu ngeling.

"Nani suba ngrangsuk ABG, nu gén jejeh ajak gumatat-gumitit!," Nang Tegteg gegéson lantas nyagjagin pianakné ané ngeling.

"Kén ané serem nto? Kén..? Lipi ae?," sambilanga ngaba gegitik nang Tegteg nagih nglantig beburon ané jejehina tekén I Méngong macelep ka WC. Tepukina I Méngong nguntul nganggarang cédok!

"Né nang...! Apa né? Ibi nak sing asana misi! Jani adi misi kéné nang? hikss..hikss..."

Ditu lantas magebris Nang Tegteg kedék nepukin tingkah pianakné ané nolih barang antikné misi ngeling sengi-sengi.

"Béh... béh..., dong kadén Nanang ada apa nani gelur-gelur! Lélé makumis bulu medang nyehin nani?! Hahahaha..."

"Ngujang nanang kedék?," Méngong gedeg sada semu jelé.

"Men, ento nak mula bisa Ngong! Nani suba madan ngrangsuk bajang.. suba ABG sambatanga! Nak tuah lumrah lélén naniné tumbuh bulu! Nak mula ditu tongosné! Nyiriang nani suba menék kelih!"

"Sing makada éngkén né nang?"

"Tusing! Né gelah nanangé gémbrongan kin gelah naniné, nanang sing ja jejeh! Sangkalanga urati bedik ajaak lingkungan, nuju manjus di tukadé sing tepukin nani kuda?"

"Aing nang! Nak mkjang timpalé manjus macawet di tukadé! Sing ada nyak mlalung cara pidan!"

"Oh, nto sing ulian elek ketaranga ajak timpal-timpalné! Sangkalanga ye jejeh manjus mlalung! Mirib patuh cara nani! Hahahaha....!"

"Ahh... nanang!"

I Méngong laut ngelingus tur nglanturang manjus. Nang Tegteg nu kedék ingkel-ingkel ban paripolah pianakné. Puput.

-pkj'15-