Makecuh Marep Menék - All get in

Makecuh Marep Menék

Yéh Manawi jroné lali linglung laksana,
Tan minab jroné éling tata titi makrama,
Rumasa aab jagad modernisasi ngih?
Sami gatra paripolah palemahan lan0 pawongan,
Kadén jrone dados kasobyahang ring jagad maya niki?

Yéh jro, élingang tan sami becik kaumbar,
Genahé puniki nak sami sida nyingakin,
Boya wantah timpal lan pisaga manten sané nyingak,
Becikang ngunggah sakancan polah ring media sosial,
Ngiring ngawangun citra positif,
Kadén jroné sampun uning?!
Bali kaloktah kramané ramah turmaning uning matata titi,
Jadma dura désa ngasubang gumin iraga,
Yéh dong jeroné dados wwang Bali solahé soléh mangéndah?
Mérbérang buat rusak paripolah jero néwék?!
Patutné iraga malajah saking pengalaman jro..
Sampunang mérbérang kajelekan iraga pedidi,
Patut éling jroné makecuh marep menék,
Sané keni jroné néwék..!!

Nyingak pisaga nyen timpal marebat,
Potrek laut unggah ring facebook,
Negak makumpul matimpal bir, arak, wisky,
Potrek laut unggah ring twitter,
Jogéd porno, buang angkab-angkab melitang kamen,
Potrek laut unggah ring Path,
Béh...béh... bangga jroné makarya caption ring gambar,
"Joged hots masa kini, tarik mas.."
"Sing ada yéh putih, kanguaang bir kin wisky"

Ten uning jroné tungkul tis jaen idup di Bali,
Kramané di selat pasih ngenyék tur kedék ngakak,
"Oh kéto bikas nak Bali cara jani, sajaan tongos maksiat"
"Mih, kéto ajah-ajahan nak di Bali, mabuk lan maporno-pornoan"
"Béh macokrah paturu nyamané naké Bali!"

Jro... jro... sampunang pelihanga jadma selat pasih nika ngenyék, nyacad, matbat,
Mapan jroné tan uning ngajiang raga padidi,
Tungkul asik nyambat jaen idup di Bali,
Engsap jroné mongpong awak pedidi,
Disakité lantas wau éling!
Béhhh...!!!

(PKJ'15)