Wenten silih sinunggil puisi mamurda “Basa Bali” karya Suntari Pr. (Putra, 2010; 79). Puisi puniki
pinaka kriya sastra sane medal kapertama puisi Bali anyar, sane kaadegang pinaka tunggak panglimbak puisi Bali Anyar.
Puisi Bali Anyar punika wantah sastra sane kaangge nartaang pabesen, ngangge basa sane bawak nanging dagingne padet. Puisi puniki sastra sane kakomunikasiang boya ja gatra, sakewanten karya sastra sane madaging rasa muah napi sane kacingak indik kahuripan,nglimbakang tur najepang kontak-kontak ring sane katerapin.
Unsur-unsur ring puisi :
1. Unteng
2. Rasa
3. Nada( tangkep pangawi)
4. Pabesen /piteket
Ring sor
puniki jagi kawedarang indik wangun puisi;
- Judul (Murda) ; murda puniki ngawangun puisi
- Tema (unteng,Suksman utawi tetuek); unteng sane meled kawedarang saking pangawi inggih punika; indik, kadiatmikan, kaweruhan, tatuwek, kawentenan kahuripan parajana.
- Suara (Kanti suara utawi sajak); kanti suara dahat mautama sane ngawangun puisi, krana kanti suara punika sane ngawi puisi punika becik kapireng lan kawacen, lan basanyane ngulangunin.
- Kalimat (lengkara); tata lengkaranyane kasurat pegat-pegat, lan kalanturang ring sor, nika sane ngawinang ngawentuk sajak utawi kanti suara, sane prasida puisi (sajak) punika madue tanjek lan pangrasan ring soang-soang kruna ring lengkarane.
- Imaji (wirasa, daya bayang); para pengawi stata ngawetuang daging kekawiannyane mangda sang sane ngawacen seneng.
- Kosabasa (kosa kata); kaweruhan sang pengawi indik kawentenan kosabasa sane wenten ring puisi punika sane nyutetang daging puisi punika becik.
Mangda papacan puisine lengut tur ngelangunin pinih becik telebang dumun uger-uger ngwacen sakadi ring sor puniki :
1. Resep, Wirasa
Pinih riin sadurunge ngwacen, patut resepang dumun suksma, wirasan utawi unteng puisi sane jagi kawacen. napike puisi punika madaging indik ksinatrian, kalulutan, kasengsaran, utawi sane tiosan. Yan tan tatas uning ring suksman puisine punika, sinah ngwetuang papacan sane tan becik utawi singsal.
2. Suara, Wirama
Yan sampun tatas ring wirasan puisi sane kawacen, patut anutang mangkin ring wiraman suara rikalaning ngwacen. ring dija patutne alus, banban utawi keras. Tur suarane rikala ngwacen mangda prasida tatas kapireng olih sang mirengang.
3. Semita/ Raras, Wiraga
Semita/ Raras = mimik
Wiraga = gerak tubuh
Ri kala ngwacen puisi, semita lan wiragane patut anutang ring wiraman suara miwah ring wirasan puisine sane kawacen. Yan suksman puisine indik kasengsaran, wenang wiraman suara , semita miwah wiragane anut sakadi anak kasengsaran. Yan sampun asapunika sinah prasida papacan puisine pangus, lengut tur nglangenin.
4. Wates Lengkara
Mangda alit-alite tatas napi Puisi Bali Anyar Indayang Piarsayang link ring sor Puniki :
Ring sor puniki jagi kawedarang indik puisi Bali Anyar lan pangawinyane;
Idup lan Mati ( I Made Sanggra)
Sasih Karo ring Bali (I Made Taro)
Galang Bulan (K.Putra)
Mati Nguda (Putu Sedana )
Bali (Ngurah Yudha Panik)
Pura Agung Jagat Natha, Margarana (I Wayan Rureg Nataran)
Pangubaktian Tan Payasa (Gst Putu Antara)
Denpasar sane Mangkin (Made Sanggra)
Imba Puisi Bali Anyar :
MUSUH BETEN CUNGUH
Sang dwi warna makibar di ambara
Di stang motor, muah telajakan umah
Sang dwi warna nyabran tiban makipir
Makenyir kewala sengir
Royod, 66 tiban ayag oyog
Ngliwatin telung masa
Orde lama, baru muah reformasi
Orde sera panggang sera tunu
Orde korupsi
Nyen ane belog?
Indonesia iragane kebus
Ane beten matambus
Ane baduur kakudus
Uyak mekel markus
Indonesia iragane buduh
Sing nepukin musuh di beten cunguh.
Olih ; I Made Sugianto
Bali Post Redita Paing,20 November 2011
NYEM LALAH
Sing ja lakar mupu
Mekejang anake suba tau
Sing masaing goba ajak laksana
Sing adung laksana ajak wibana
Luungan tuun mai dini
Munyi ane tusing maaji
Adep dini aji duang tali
Sampunang kenyem-kenyem
Mara mesuang munyi ane nyem
Sampunang ngaku elah
Mara masuang munyi ane lalah
Nyem lalah sing ja melah
Paling melah nongos jumah
Olih; I Komang Gede Hendra Arismawan
Bali Post Redita Umanis, 1 Juni 2012
Posting Komentar
Posting Komentar